Egile honen
beste liburuak

POESIA

Katiluaren ipurdia

1999, Alberdania

NOBELA

Itxoidazu Café de Passy-n

2004, Elkar

Ez dadila eguzkia sartu

2006, Elkar

Arrain abisalak

2009, Elkar

HAUR ETA GAZTE LITERATURA

Airean ere negu usaina nabari da

2000, Erein

Pako Fakirra eta Zokomokordo

2006, Elkar

Nik dauzkat aitonaren hortzak

2008, Elkar

Poema-bildumaren zartada ez da haundi horietakoa, ezpada apurka-apurka iragazten dena. Barruraino sartzen dira bere deskribapenak (haizea, gaua, etxeko eszena hunkigarri bezain single bat) baina labur antzean geratzen zaizkio gogoeta filosofikoak, apur bat gehiago ez arriskatzearren. Denak datoz, ordea, liburu bakarrean. Eta nahasteak koadro eder bat osatzen du.

Igor Estankona (Deia, 2005-06-21)

TANTAKA, IBAI ZATIAK

 

Errotondaren erdian,

gasolindegiaren eta peajearen artean,

palmera bat landatu dute.

Zentzugabea,

gehiegi pentsatutako hitz bartbezala.

Argia lehortzeko

eta behiak hiltzeko bakarrik balio duen

oasi faltsu bat

inoiz hasi ez genuen ihesaren erdian.

Aspaldiko galtzen patriketan ahaztutako

esku zahar bar bezala.

 

Penaz begiratzen dut

bere itzal mikatza,

eguzkiaren eta autoen jirabira

bere inguruan.

Oharkabean, tantaka,

ibai zatiak galtzen ari banintz bezala.

 

 

 

HIRU BIZAR

 

Azukre bizarrarekin joan naiz

zurekin kafea hartzera.

Lehenengo tragorako,

gaztetu egin naiz.

Orain nire bizarra bel-beltza da,

eta zuk asko maite nauzu.

 

Bigarrengo tragorako ordea,

bizarra kafetan urtu zait.

Orain ez daukat bizarrik,

orain haur bat naiz.

Eta zuk gizonak maite dituzu.

Joan egin zara.

 

 

Baina nik ezin dut zu gabe bizi,

eta erle bizar luze batekin

azaldu naiz zure etxe aurrera.

Orain nire muxuek

hegan egin dezakete

eta txilarraren

eta eztiaren zaporea dute.

 

Maite nauzula esan didazu leihotik.

 

 

 

TABAKOA

 

Iltze bat masturbatzea bezala.

Edo

atzamar batek

bere buruaz beste egitea, ispiluko punturen bat

seinalatu ondoren.

 

Gauaren lehengusua beti.

Begiak eta hortzak

iluntzen,

izarrak lurperatzen.

 

Samina

eta hitza

eta kea

eta oroimena

lagun dituela.

 

Hire etsaiak.

Hire hezurrak.

 

Puta politaren belarritako beltza

Zakurraren begiak, kale ertzean.

Aitaren jertsearen usaina,

negarrez,

bere zilbor parean helduta

besarkatzen huenean.

 

Bere begirada luze hura.

 

Eztarririk gabeko mingaina.

 

Aulki galdu bat,

hondartzan,

eta itsasoa haserre.

 

Hiltzea bezala,

heriotzaz pentsatzen

hasi hintzenean.

 

Zeruko hodei bakar horri

musu gris bat

bidaltzea bezala.